မေတ္တာတရား ဆိုသည်မှာ ~ လပ်ကီးမြို့တော်

မေတ္တာတရား ဆိုသည်မှာ......................

မေတ္တာ(အဒေါသ)တရားသည် လောကတွင် ငြိမ်းချမ်းခြင်းကိုဆောင်သော တရားပင်ဖြစ်၏။ မေတ္တာတရားဖြင့် လွှမ်းခြုံထားလျှင် (မေတ္တာစိတ်ဖြင့် နေထိုင်ကျင့်ကြံနေလျှင်) ကမ္ဘာလောက ၌လည်းကောင်း၊ မိမိသန္တာန်ရှိ တစ်လံမျှသော ခန္ဓာလောက၌လည်းကောင်း အေးချမ်းမှုကို ဖြစ်စေ၏။ ဒေါသတရားသည် ပူလောင်ခြင်းကိုပေးပြီး မေတ္တာ၏ ဆန့်ကျင်ဘက်တရားဖြစ်၏။ ဒေါသတရားတွေ ပွါးနေပြီဆိုလျှင် မိ
မိ၌လည်းကောင်း၊ သူတစ်ပါးတို့၌လည်းကောင်း ပူလောင် ပြင်းပြသော ဆင်းရဲခြင်းတရားတို့ကို စိတ်အစဉ်မှာရော၊ ကိုယ်အစဉ်မှာရော ခံစားရတော့၏။ ဒေါသကြောင့် အမြင်မှန်တရားတို့ကိုလည်း ကင်းပျောက်စေပေသည်။

လိုတာမရလျှင် မကျေနပ်သည့်အတွက် ဆင်းရဲရ၏။ ရ,ထားတာကို မကျေနပ်ပြန်တော့လည်း ဆင်းရဲရပေသည်။ “ပိယေဟိ ၀ိပ္ပယောကော ဒုက္ခော၊ အပိယေဟိ သမ္ပယောကော ဒုက္ခော- လိုချင်နှစ်သက်တာတွေ မရရှိတော့ ဆင်းရဲရ၏။ မလိုချင် မနှစ်သက်တာတွေနှင့် ကြုံတွေ့နေရ ပြန်တော့လည်း ဆင်းရဲရပေသည်။” အကြောင်းမှာ ရရှိထားသည့် ဘ၀ကိုက ဒုက္ခသစ္စာတရား ဖြစ်နေပေသည်။ ရတာမလို၊ လိုတာမရခြင်းကိုက ဒုက္ခသစ္စာနယ်တွင် ဖြစ်နေသည့် ဓမ္မသဘော တရားပင်ဖြစ်သည်။ ၎င်းကို ရချင်တာမရလို့ ငိုကြွေး၊ မရချင်တာတွေရလို့ ပူဆွေးနေက ဒုက္ခသစ္စာနယ်၏ နှိပ်စက်ဒဏ် မနားတမ်းပင်ခံစားရတော့မည်။ ဤသို့ပူဆွေးနေလျှင် ခံစားရင်း သေသွားလိုက်ဖြင့် ဘယ်တော့များမှ အသေရပ်နိုင်တော့ပါမည်နည်း။

မကျေနပ်မှု(ဒေါမနဿ)တို့သည် တရားကိုယ်အားဖြင့် ဒေါသဖြစ်၏။ ဘ၀မှာ မရနိုင်သည့် အရာကို ကိုယ်ရပိုင်ခွင့်မရှိလို့ဟု ဆင်ခြင်နိုင်ပြီး ကိုယ့်ရပိုင်ခွင့်ရှိတာလေး ကျေနပ်ရောင့်ရဲနိုင် အောင် ကျင့်ကြံပွါးများခြင်းဖြင့် အေးချမ်းမှုကို ရယူနိုင်ပါသည်။ အေးချမ်းမှုကိုရရှိဖို့် မေတ္တာစိတ် အစဉ်ဖြစ်နေအောင် နှလုံးသွင်းကျင့်ကြံရမည်။ မေတ္တာတရားသည် ကျယ်ဝန်းနက်ရှိုင်းလှ၏။ အကန့်အသတ်၊ အပိုင်းအခြားဟူသော နယ်နိမိတ်များ မရှိပေ။ ထိုသို့ ပိုင်းခြားကန့်သတ်ထား သော နယ်နိမိတ်မရှိဘဲ မေတ္တာတရား ပွါးများအားထုတ်နိုင်လျှင် နောက်ဆုံး၌ သစ္စာလေးပါးကို ထိုးထွင်းသိမြင်နိုင်ပြီး ထာဝရအေးချမ်းမှုသဘော မသေရာ အမြိုက်ချမ်းသာကို ရရှိခံစားနိုင် ကြောင်း မေတ္တသုတ်ပရိတ်တော်၌ ဘုရားရှင် ဟောကြားဆုံးမထားပေသည်။

“မာတာ ယထာ နိယံပုတ္တ၊ မာယုသာ ဧကပုတ္တ မနုရက္ခေ။ ဧ၀မ္ပိ သဗ္ဗဘူတေသု မာနသံ ဘာဝယေ အပရိ မာဏံ။”
မာတာ- အမိသည်၊ နိယံပုတ္တ- မိမိကို မှီ၍ဖြစ်သော၊ ဧကပုတ္တံ- တစ်ယောက်တည်းသောသား ကို၊ အာယုသာ- အသက်ကြောင့်၊ မနုရက္ခေ ယထာ- အဖန်တလဲလဲ စောင့်သကဲ့သို့၊ ဧ၀မ္ပိ- ထို့ အတူလျှင်၊ သဗ္ဗဘူတေသု- ခပ်သိမ်းသောသတ္တ၀ါတို့၌၊ အပရိမာဏံ- အတိုင်းမသိသော၊ မာနသံ- မေတ္တာစိတ်ကို၊ ဘာဝယေ- ပွါးစေရာ၏။ (မိခင်က မိမိ၏ရင်၌လွယ်၍ဖွားပြီး တစ်ဦး တစ်ယောက်တည်းရှိသောသားကို အသက်တမျှ ချစ်ခင်ကာ ထာဝစဉ်ပြုစုစောင့်ရှောက်နိုင် သော မေတ္တာစိတ် ထားသကဲ့သို့ အခြားသောသူတို့ကိုလည်း အတိုင်းမသိသောမေတ္တာစိတ် ထားရာ၏။)

မေတ္တာစိတ်ထား အစဉ်မွေးမြူနိုင်အောင် တစိုက်မတ်မတ် ကျင့်ယူရမည်။ နေ့စဉ်နှင့်အမျှ ကြုံတွေ့နေရသည့် အာရုံတရားတွေကြောင့် ဖြစ်ပေါ်လာသော ဒေါသတရားတွေကို ထိန်းရ ပါမည်။ ယောနိသော မနသိကာရ- အသင့်အတင့်အမှန်အတိုင်း နှလုံးသွင်းနိုင်အောင် ကြိုးစားရပေမည်။ ကိုယ်က အခြားသူတို့လို ကောင်းကောင်းမ၀တ်နိုင်၊ ကောင်းကောင်း မစားနိုင်၊ အဆင့်အတန်းမြင့်မြင့်မနေနိုင်ခြင်းကို အကြောင်းအရင်း အမှန်မမြင်နိုင်ဘဲ သည်းမခံ နိုင်ခြင်းကြောင့် “အူမ,တောင့်မှ သီလစောင့်နိုင်တာ”ဟု တလွဲတွေး အယူမှားပြီး သီလပျက်၍ စီးပွါးမရှာသင့်။ မိမိ သီလမရှိခြင်းကို အပြစ်ကိုဖုံးကွယ်သည့် အ၀ိဇ္ဇာ (မောဟ)ကြောင့် သီလ ရှိသူတို့အား စော်ကားမောက်မာတတ်သည့် ဒေါသတရားတွေ၊ လုပ်ငန်းဆောင်တာ၊ ရည်ရွယ် ထားတာတွေက မအောင်မြင်၊ မှန်းထားသည့်အတိုင်း ဖြစ်မလာသည့်အခါ (နေ့စဉ်နေ့တိုင်း ကြုံတွေ့နေရတာတွေက ကိုယ်စိတ်အလိုကျ မဖြစ်သည့်အခါ) ပေါက်ကွဲထွက်လာတတ်သည့် ဒေါသတရားတွေ၊ နေပူပြန်တော့ နေကြီးနဲ့ပူလိုက်တာ၊ ပူလိုက်အိုက်လိုက်တာ လွန်ပါရော၊ မိုးရွာတော့လည်း ဒီမိုးနဲ့ အချိန်အခါမဟုတ်၊ ရွာပဲရွာနိုင်လွန်း၊ သွားလို့မကောင်း၊ လာလို့ မကောင်းလိုက်တာ၊ အနံ့အသက် မကောင်းသည့်လေကို ရှူမိတော့လည်း အနံ့ကြီးနဲ့ ဆိုးလိုက် တာ၊ အံတောင်အံချင်တယ်ဟူ၍ ပေါက်ကွဲထွက်ပေါ်လာသော ဒေါသတရားတွေ၊ တစ်ခါလာ လည်း ဒီဟင်း၊ တစ်ခါလာလည်း ဒီထမင်းဟူ၍ ဟင်းကောင်းကောင်း ချက်မထားလို့ ဟင်းချက်သည့် မိခင်ကိုပင် ဆူအောက်၊ ချက်ပြုတ်ကျွေးသောဇနီးသည်ကို ငေါက်ငန်းတတ်ပြီး အရသာရှိအောင် ဆောင်ရွက်မထားသည့် အိမ်ဖော်ကျေးကျွန်တို့ကိုလည်း အော်ဟစ် မောင်းထုတ်တတ်သော ဒေါသတရားတွေသည် မိမိကိုယ်ကိုလည်းကောင်း၊ အခြားသူတို့ကို လည်းကောင်း ပူလောင်ရတော့၏။ ထိုသို့ မကျေနပ်ဖွယ်ဟု နှလုံးသွင်းနေလျှင် ကံ၊ စိတ်၊ ဥတု၊ အာဟာရစသော တရားလေးပါးတို့နှင့် နေ့စဉ်ရန်ဖြစ်၍သာ နေရတော့မည်။

ထိုသို့ ဒေါသစိတ်များ မဖြစ်ပေါ်အောင် စိတ်ကို စောင့်ရှောက်ရပေသည်။ အမှန်အတိုင်းမြင် နိုင်အောင်၊ အကောင်းဘက်ကမြင်နိုင်အောင် ပညာဖြင့် ဆင်ခြင်ရပေသည်။ အာရုံတရားတို့ အပေါ်တွင် မနှစ်သက်စရာ၊ မကြိုက်သည့်အရာဟု မြင်နေခြင်းသည် ဒေါသကိလေသာကြောင့် ဖြစ်ပေါ်လာသောအမြင်ဖြစ်၏။ အာရုံကို အာရုံဟုသာသိလိုက်လျှင် ဒေါသဖြစ်စရာလည်း မဟုတ်၊ လောဘဖြစ်စရာလည်း မဟုတ်တော့ပေ။ “သဘာဝဟာ သဘာဝပါ”ဟု မှတ်ယူ နိုင်လျှင် အမှန်မြင်ခြင်းကြောင့် စိတ်အေးချမ်းနိုင်ပေသည်။ ထိုသို့ မေတ္တာစိတ်လေးဖြစ်အောင် ကျင့်ကြံနိုင်လျှင် အခြားသူတို့ကို ထိခိုက်မိခြင်း၊ မိမိကိုယ်ကို ပူလောင်ခြင်းမျိုး မရှိတော့ပေ။

နေ့စဉ်ကြုံတွေ့နေရသည့် လာဘ်ရ မရ၊ ရှုံ့ချ မြှောက်စား၊ နည်းများ ခြံရံ၊ သုခံ ဒုက္ခာ စသော လောကဓံတရားတို့ကို ရန်သူကြီးသဖွယ် သဘောထားပြီး နပန်းလုံး သတ်ပုတ်မည်ဆိုပါက လည်း သူက အားကောင်းမောင်းသန်သည့် ခွန်အားအပြည့်နှင့် လူသတ်ယောက်ျားရှစ်ဦး၊ ကိုယ်က တစ်ယောက်တည်း- ခွန်အားမရှိ၊ အစားမစားရဘဲ ချုပ်နှောင်ခံထားရသည့် ရာဇ၀တ်သား ယောက်ျားပမာ မည်သို့မျှ အောင်နိုင်လိမ့်မည်မဟုတ်ပေ။ လောကဓံတရား တို့ကို မကျေနပ်လို့ ဒေါသဖြင့် နပန်းလုံးသတ်ပုတ်နေတိုင်း ကိုယ်ကချည်း အရှုံးဖြစ်နေသည်ကို သတိရှိရမည်။ ထို့ကြောင့် လောကဓံတရားတွေကြောင့် ဒေါသမဖြစ်ပေါ်နိုင်အောင် နှလုံးသွင်း ကျင့်ကြံရမည့်နည်းမှာ- “လာဘ်ရ မရ၊ ရှုံ့ချ မြှောက်စား၊ နည်းများ ခြံရံ၊ သုခံ ဒုက္ခာ ဤရှစ်ဖြာကြောင့် ဒေါသတည်းမြူ မရှိမူ မှတ်ယူ မင်္ဂလာ။” ဟူ၍ဖြစ်၏။

ကိုယ်နှင့်ပတ်သက်သည့် အခြားသူတို့ကိုပါ ထိခိုက်မှုဖြစ်စေသည့် ၀ီတိက္ကမဒေါသတွေ၊ ကိုယ်စိတ်အလိုမကျတိုင်း စိတ်ထဲမှာသောင်းကျန်းနေတတ်သည့် ပရိယုဋ္ဌာနဒေါသတွေ၊ အခါအခွင့်သင့်သလို မကျေနပ်မှုလေးတွေပေါ်လာသည့် အနုသယဒေါသတွေက တစ်လည့်ပြီး တစ်လှည့်၊ တစ်မျိုးပြီးတစ်မျိုး နှိပ်စက်နေတတ်ပေသည်။ ထိုသို့ ဖြစ်ပေါ်လာသည့် ကိလေသာ ဒေါသသူခိုးကို အိမ်ရှင် သတိပညာဖြင့် မြင်အောင်ကြည့်ပေးရာ၏။ သူခိုးသည် အိမ်ရှင်မြင်လျှင် ကြောက်အားလန့်အားနှင့် ပြေးသကဲ့သို့ ဒေါသဖြစ်မှန်း သတိပညာဖြင့် မြင်အောင်ကြည့်လိုက် ပါက အပြီးတိုင် မပယ်သတ်နိုင်သေးတောင်မှ တဒင်္ဂ ပယ်သတ်ငြိမ်းအေးနိုင်၏။ အနုသယ ဒေါသကိလေသာကို အပြီးတိုင်ပယ်ထုတ်နိုင်ဖို့ကလည်း အနာဂါမိမဂ်ဖိုလ်သို့ ဆိုက်ရောက်မှ ပယ်သတ်နိုင်ပေသည်။

ဒေါသတရားသည် စိတ်ဓာတ်ကို ကျဉ်းမြောင်းကြပ်တည်းစေ၏။ ဒေါသဓာတ်ခံ အားကြီးသူ သည် အပေါ်ယံကြည့်၍ စိတ်ဆိုးတတ်၏။ ဥပမာအားဖြင့် လူတစ်ဦးသည် ရေကန်ကို တွေ့သည့်အခါ ရေပေါ်တွင်မြင်နေရသော ရေညှိရေမှော်တို့ကိုကြည့်၍ စိတ်ဆိုးပေသည်။ ရေဆာလို့ ရေကို မသောက်နိုင်ဖြစ်၏။ အခြားသူတစ်ဦးကတော့ ရေပေါ်က ရေညှိရေမှော်တို့ကို ဖယ်၍ အောက်တွင်ရှိသော ရေကြည်ကိုမြင်အောင်ကြည့်တတ်သောကြောင့် ရေမှော်ကိုဖယ်၍ အောက်၌ရှိသောရေကြည်ကို သောက်သုံးပြီး အမောကိုပြေစေ၏။

ထိုသူနှစ်ဦး၏ ခြားနားခြင်းမှာ အမြင်မတူညီခြင်းပင်ဖြစ်၏။ မနာပ ဘာဝ ဒဿန- အကောင်း ဘက်က ကြည့်ခြင်းနှင့် အမနာပ ဘာဝ ဒဿန- အဆိုးဘက်ကကြည့်ခြင်းဟူသော အမြင် မတူညီမှုပင်ဖြစ်သည်။ မနာပ ဘာဝ ဒဿန ရှိသူက အပြောဆိုးပြီး အလုပ်ကောင်းသူကို မြင်လျှင် “ဒီလူကတော့ဟေ၊ အပြောသာဆိုးတာ အလုပ်ကတော့ တော်တော်လေး ကောင်းတယ်”ဟူ၍ ချီးကျူးပြီး ကျေးဇူးတင်နိုင်၏။ အလုပ်ဆိုးပေမယ့် အပြောကောင်းသူကို တွေ့ပြန်တော့လည်း “အင်း ဒီလူကျပြန်တော့လည်း အလုပ်သာဆိုးတာ အပြောတော့ ကောင်းပါတယ်”ဟူ၍ ချီးမွမ်းပြီး ကျေးဇူးတင်နိုင်ပေသည်။ ထို့ကြောင့် မေတ္တာစိတ်ကလေး ဖြစ်နေအောင် ကျင့်ကြံရမည်မှာ-
နှစ်သက်စရာ ရွေးရှာ မေတ္တာ၊
ကျေနပ်စရာ ရွေးရှာ မေတ္တာ၊
ကြည်နူးစရာ ရွေးရှာ မေတ္တာ
အစဉ်ဖြစ်နေအောင် မနာပ ဘာဝ ဒဿနဖြင့် ဒေါသမဖြစ်ပေါ်အောင် ကျင့်ကြံရပေသည်။

ဤနေရာတွင် ဘာသာခြားတို့အား မေတ္တာစိတ်ထားပြီး ဆရာတော် အရှင်ဇ၀န(မေတ္တာရှင်-ရွှေပြည်သာ) ဆုံးမထားသော ဆုံးမစကားလေးကို ဖော်ပြချင်ပါသည်။ “ရောဂါတစ်ခုခု ဖြစ်နေသူသည် သူ့လူမျိုးဖော်စပ်သော ဆေးမဟုတ်သောကြောင့် အခြားလူမျိုးဖော်စပ်သော ဆေးကောင်းကိုတွေ့သော်လည်း မသောက်ဘူးဆိုလျှင် ရောဂါမပျော်ရုံသာရှိ၏။ ထို့အတူ ၀ိပဿနာတရားကို မိမိတို့ကိုးကွယ်သောဘုရားကပြသော တရားမဟုတ်၍ 'မကျင့်နိုင်' ဟုဆိုလျှင် ကိလေသာရောဂါ မပျောက်ရုံသာရှိ၏။” ၀ိပဿနာတရားအားထုတ်နည်းသည် ဘုရားရှင်တစ်ဆူ ပွင့်ထွန်းပေါ်ပေါက်မှသာ နားကြားသိရှိခွင့်ရသည့်နည်းဖြစ်ခြင်းကြောင့် သာသနာတွင်း လူဖြစ်တုန်းလေး ကြုံတွေ့ခွင့်ရခြင်းဖြစ်သည်။ ကြံသကာအရသာသည် တရုတ် စားလည်းချိုသည်။ မြန်မာစားလည်းချိုသည်။ ကုလားစားလည်းချိုသည်။ မည်သည့်လူမျိုး စားစား ချိုသောအရသာကိုသာ ခံစားရ၏။ ထုိ့အတူ ၀ိပဿနာတရားကျင့်စဉ်၊ မေတ္တသုတ် ပရိတ်တော်လာ အားထုတ်နည်းတို့သည် ဗုဒ္ဓဘာသာကို ခံယူထားသူတို့အတွက်သာ ဘုရားရှင် ဟောထားခဲ့ခြင်းမဟုတ်ပေ။ ဘုရားတရားမှန်သမျှတို့သည် သတ္တ၀ါအားလုံးအတွက် ဟောကြားခဲ့ခြင်းသာဖြစ်ပေသည်။ ထို့ကြောင့် ဘုရားရှင်ဟောကြားထားသောနည်းများကို မည်သည့်လူမျိုး၊ မည်သည့်ဘာသာဝင်ဖြစ်စေ လိုက်နာကျင့်ကြံသူအားလုံး စိတ်အေးချမ်းမှုကို ဖြစ်စေပြီး အို နာ သေ ကင်းသည့် အမတဓာတ်မြတ်ကို ရရှိခံစားနိုင်ကြမည်ကို ယုံကြည်စွာ ကျင့်ကြံအားထုတ်သင့်ပေသည်။

မေတ္တာကမ္မဋ္ဌာန်း စီးဖြန်းမည့်ယောဂီသည် အမြဲကျင့်ကြံနေရမည်မှာ-
(၁) သက္ကော စ- ကောင်းစွာပြုခြင်းငှါ တတ်သည်လည်းကောင်း၊
(၂) ဥဇု စ- ဖြောင့်မတ်သည်လည်းကောင်း၊
(၃) သုဟုဇု စ- လွန်စွာဖြောင့်မတ်သည်လည်းကောင်း
(၄) သုဝစော စ- ပညာရှိတို့ ဆိုဆုံးမလွယ်သည်လည်းကောင်း၊
(၅) မုဒု စ- နူးညံ့သည်လည်းကောင်း၊
(၆) အနတိမာနိ စ- ထောင်လွှားတက်ကြွသော မာန်မာန မရှိသည်လည်းကောင်း၊
(၇) သန္တုဿကော စ- ရောင့်ရဲလွယ်သည်လည်းကောင်း၊
(၈) သုဘရော စ- မွေးမြူလွယ်သည်လည်းကောင်း၊
(၉) အပ္ပ ကိစ္စော စ- နည်းသောအမှုကိစ္စ ရှိသည်လည်းကောင်း၊
(၁၀) သလ္လဟုက၀ုတ္တိ စ- ပေါ့ပါးသောအသက်မွေးခြင်း ရှိသည်လည်းကောင်း၊
(၁၁) သန္တိန္ဒြိယော စ- ငြိမ်သက်သော ဣနြေ္ဒရှိသည်လည်းကောင်း၊
(၁၀) နိပကော စ- ရင့်ကျက်သောပညာရှိသည်လည်းကောင်း၊
(၁၁) န အပ္ပ ဂဗ္ဘော စ- မကြမ်းတမ်းသည်လည်းကောင်း၊
(၁၂) ကုလေသွ အနနုဂိဒ္ဓေါ စ- ချစ်ခြင်းမုန်းခြင်းအစွဲကင်းခြင်းသည်လည်းကောင်း၊
အမြဲရှိနေရမည်ဖြစ်သည်။ မေတ္တာကမ္မဋ္ဌာန်း စီးဖြန်းသည့်သူသည် ထိုသို့သော စိတ်နေသဘော ထားများ ရှိနှင့်နေရမည်ဖြစ်သလို မေတ္တာစိတ်များဖြင့် ထုံမွှမ်းနေပြီဆိုလျှင်လည်း ထိုသို့သော စိတ်နေသဘောထားများ လွယ်ကူစွာမွေးမြူနိုင်သွားပြီဖြစ်၏။

တဖန် မေတ္တာကမ္မဋ္ဌာန်း စီးဖြန်းမည့်သူသည် “နစ ခုဒ္ဒ မာစရေ ကိဉ္စိ၊ ယေန ၀ိညူ ပရေ ဥပ ၀ရေယျုံ- ပညာရှိသူတော်ကောင်းတို့ ကဲ့ရဲ့အပ်သော အမှုမှန်သမျှတို့ကို အနည်းငယ်လေးမျှ မပြုကျင့်အပ်ပေ။” မပြုလုပ်အပ်ပေ။ မကောင်းမှုဟူသည် ဆိတ်ကွယ်ရာဟူ၍ မရှိ။ မိမိကိုယ်ကို မိမိသိ၏။ သူတစ်ပါးအား ညာလိုရသည်၊ မိမိကိုယ်ကိုတော့ ဘယ်လိုမှ ညာ၍မရနိုင်ပေ။ မကောင်းမှု မှန်သမျှတို့ကို နည်းနည်းလေးပဲဟူ၍ မထီမဲ့မြင် မပြုမိစေရာ။ အကြီးဆုံးသော အရာတို့သည် နည်းနည်းလေးများ ပေါင်းစုထားခြင်းသည်သာဖြစ်၏။ အကြီးမားဆုံးသော အဆောက်အအုံကြီးသည် အက်တမ်စသော အမှုန်ကလေးများဖြင့် ပေါင်းစုထားသည့် ဒြပ်ဝတ္ထုကြီးသာဖြစ်သည်။

မေတ္တာစိတ်ဖြစ်အောင် အားထုတ်ရာ၌ (၃)မျိုးရှိ၏။ ပို့မေတ္တာ၊ ပွါးမေတ္တာ၊ ထားမေတ္တာတို့ ဖြစ်ကြ၏။ “သတ္တ၀ါအားလုံး ဘေးရန်ကင်းကြပါစေ၊ စိတ်ဆင်းရဲခြင်း ကင်းကြပါစေ၊ ကိုယ်ဆင်းရဲခြင်း ကင်းကြပါစေ၊ မိမိ၏ ခန္ဓာဝန်ကို ကျန်းကျန်းမာမာ၊ ချမ်းချမ်းသာသာဖြင့် ထမ်းဆောင်နိုင်ပါစေ၊ အရပ်ဆယ်မျက်နှာ အနန္တစကြာဝဠာရှိ သတ္တ၀ါတို့ကို ချမ်းသာကြစေပါစေ၊ ရှည်တိုအလတ် သုံးရပ်ခန္ဓာ သတ္တ၀ါ၊ မြင်အပ်မမြင်အပ်အစရှိသည့် သတ္တ၀ါများ ချမ်းသာကြပါ စေ အစရှိသည်ဖြင့် နှုတ်ဖြင့် အာရုံပြုရွတ်ဆိုပို့သနေခြင်း”သည် ပို့မေတ္တာ၊ တစ်စိတ် တစ်အာရုံ ဖြင့်တည်ပြီး စိတ်ဖြင့်သာ အာရုံပြု၍ သမ္မထကမ္မဋ္ဌာန်းစီးဖြန်းနေခြင်းသည် ပွါးမေတ္တာ၊ အခြား သတ္တ၀ါတို့၏အကျိုးကို လိုလားပြီး၊ အခြားသောသတ္တ၀ါတို့၏ချမ်းသာကို အလိုရှိပြီး ကာယကံ မြောက် ပြုမူဆက်ဆံနေထိုင်ခြင်း၊ သတ္တ၀ါအများ ချမ်းသာကြောင်းအလုပ်တို့ကို ကာယ၊ ဉာဏ၊ ၀ီရိယတို့ဖြင့် အားထုတ်ခြင်းသည် ထားမေတ္တာဖြစ်၏။

ထားမေတ္တာရှိဖို့မှာ အခက်ခဲဆုံးဖြစ်သည်။ သတ္တ၀ါတို့အား မေတ္တာပို့သခြင်း၊ မေတ္တာစိတ် တွေဖြစ်နေအောင် ပွါးများနေခြင်းကို လူတိုင်းလုပ်နိုင်ကြသော်လည်း အချင်းချင်း မေတ္တာထား ပြီး ဆက်ဆံဖို့၊ ပြုမူဖို့၊ မေတ္တာထားပြီး သူတစ်ပါးအကျိုးကို လုပ်ကိုင်ဆောင်ရွက်ပေးဖို့အတွက် မှာ ခန္တီစ- သည်းခံခြင်းတရားဖြင့် အမြဲယှဉ်တွဲထားနိုင်မှ မေတ္တာထားနိုင်ပေသည်။ သတ္တ၀ါ အများ၏အကျိုးကို ကာယကံမေတ္တာထားနိုင်ဖို့အတွက် မိမိ၏အချိန်ကိုလည်းပေးနိုင်ရမည်။ မိမိ၏ဥစ္စာကိုလည်း စွန့်လွှတ်နိုင်ရမည်။ ရသမျှနှင့်လည်း ရောင့်ရဲနိုင်ရမည်။ လောကဓံအမျိုးမျိုး ကိုလည်း ကြံ့ကြံ့ခံနိုင်ရပါမည်။

ထားမေတ္တာ ကျင့်ကြံနိုင်ဖို့ မိမိ၏အကျိုးတစ်စုံတစ်ရာကို သူတစ်ဦးက ဖျက်ဆီးလိုက်လျှင် ထိုသူ့အပေါ်၌ မေတ္တာထားပြီး သူ့ကောင်းကျိုးအတွက် ဆောင်ရွက်ပေးဖို့၊ ပြုမူနေထိုင်ပေးဖို့ စွမ်းနိုင်ရပါမည်။ မနာလို၊ ၀န်တိုသောစိတ်များ မည်သူ့အပေါ်မျှ မထားရပေ။ “သင်ကောင်းလျှင် ကျွန်ုပ် မဆိုးပါ။”ဆိုလျှင် “သင်ဆိုးလျှင် ကျွန်ုပ်လည်း ဆိုးရပါလိမ့်မည်။”ဟူ၍ ဖြစ်သွားပါမည်။ ထိုသို့တုန့်ပြန်လျှင် ထားမေတ္တာ ပျက်သွားပေသည်။ ထားမေတ္တာကျင့်နိုင်ဖို့အတွက် “သူက ကောင်းကောင်း၊ မကောင်းကောင်း၊ ကိုယ်ကကောင်းအောင် ကျင့်ရမည်။ သူကတော်တော်၊ မတော်တော် ကိုယ်က တော်အောင်ကျင့်ရပေမည်။” ထိုကဲ့သို့ ဘုရားအလောင်းတော်တို့၏ မေတ္တာစိတ်မျိုး၊ ပါရမီရှင်ကြီးများ၏ မေတ္တာစိတ်ထားမျိုး မွေးမြူနိုင်အောင် ကျင့်ကြံရပေမည်။